Ани Ерно е добитничка на Нобеловата награда за литература, соопшти Шведската кралска академија.
Како што наведуваат од Шведската академија, таа ја добила наградата „за храброста и клиничката острина со која ги изложува корените, отуѓувањата и колективните ограничувања на личната меморија“.
Нобеловата награда за литература минатата година му беше доделена на танзанскиот писател Абдулразак Гурна.
Нобеловата сезона започна во понеделник со прогласување на добитниците на Нобеловата награда за медицина. Овогодинешниот победник е шведскиот генетичар Сванте Пабо за откритија во областа на изумрените хоминински геноми и човечката еволуција.
Во вторникот беа објавени добитниците на Нобеловата награда за физика и тоа професорот на Универзитетот во Париз-Сакле и Политехничкото училиште Ален Аспект, теоретскиот и експериментален физичар Џон Ф. Клаузер од САД и професорот на Универзитетот во Виена Антон Цијлингер. Тие беа наградени за „експерименти со заплеткани фотони кои утврдуваат прекршување на нееднаквостите на Бел и за пионер во науката за квантните информации“.
Во средата, Нобеловата награда за хемија им беше доделена на Каролин Бертоза, Мортен Мелдал и К.Бери Шарплес за развој на хемијата за кликање и биоортогонална хемија.
Нобеловите награди постојат благодарение на шведскиот научник и индустријалец Алфред Нобел, изумителот на динамитот, кој сакаше секоја година од неговиот фонд да се издвојуваат пари за да придонесе за човештвото.
Доделувањето на наградата традиционално се одржува на 10 декември, денот на смртта на Алфред Нобел.
