Експерти за експлозиви во јапонската полиција оваа недела пристигнале по дојава на паркингот каде што имало сомнителна актовка во која наместо бомба пронашле секс играчки.
Полицијата во Какегава, централна Јапонија, во средата добила повик за актовка оставена на паркингот на градските гробишта, изјави портпаролот на полицијата за АФП во четвртокот.
Сомневајќи се дека се работи за експлозивна направа, на терен е испратена полициска екипа и три часа биле затворени патиштата во радиус од 300 метри.
Локалните медиуми дури мобилизираа и хеликоптер за да ја снимат опасната операција на експертот за експлозиви.
Но, по темелно пребарување, тимот во куферот пронашол само „производи за возрасни“, скромно изјавил портпаролот на полицијата.
Според тамошните медиуми, тоа место е познато како депонија на див отпад.
Јапонската полиција во последните недели е во состојба на готовност поради државниот погреб на поранешниот премиер Шинзо Абе на 27 септември во Токио.
Полицијата е критикувана поради тоа што не го заштитила поранешниот премиер кој беше убиен на 8 јули додека држеше говор за кампањата во градот Нара.
