Многу земји тешко ќе најдат замена за ограничената или блокирана испорака на руската нафта. Нејзиното поскапување ќе се одрази и на пазарите на земјоделски суровини, предупреди Банката за меѓународни порамнувања.
Основен проблем е големиот пазарен удел на руската нафта, оценува Банката, потсетувајќи дека Русија сочинува една десетина од светскиот извоз.
„Губењето руски нафтени деривати би било голем шок за глобалната економија. Малку е веројатно други производители да имаат доволно капацитети да го надополнат недостигот“, нагласува Банката во тримесечниот извештај, објавен во текот на вчерашниот ден.
Дополнително, вложувањето во истражување и експлоатација на нови нафтени извори сè уште е на претпандемиското ниво, се посочува во извештајот.
„Проблем е и планот на седумте водечки економии од Г7 за ограничување на цената на руската нафта со што треба да ѝ се намалат приходите на Русија, а со тоа и капацитетите за финансирање на војната во Украина“, нагласува Банката.
Со ограничување на рускиот извоз веројатно ќе следува остар и долготраен раст на цените, вклучувајќи ги и на храната, предупредуваат оттаму, затоа што маслодајните семиња и житариците повеќе ќе се користат за производство на биогорива како што се етанол и биодизел.
