Европската комисија сè уште сака ЕУ да ја одреди највисоката цена за рускиот гас, но потребна е повеќе работа за да се процени влијанието на таа мерка, изјави денеска европскиот комесар за енергетика Кадри Симсон.
– Ние продолжуваме да веруваме во ограничување на цената на увезениот гас од руските гасоводи, но сепак треба да работиме на проценка на штетното влијание врз некои земји-членки – рече Симсон, додавајќи дека Брисел анализира како пошироко ограничување на цените на гасот за сè што е увезено во ЕУ и дали може да функционира, објави Ројтерс.
Во меѓувреме, претседателката на Европската комисија, Урсула фон дер Лајен, изјави дека цените на гасот во земјите на ЕУ се зголемени за повеќе од 10 пати во однос на периодот пред пандемијата на коронавирусот.
– Сврзувањето крај со крај стана извор на вознемиреност за милиони бизниси и домаќинства. Но, Европејците храбро се справуваат со тоа – рече фон дер Лајен.
Таа потсети дека лани рускиот гас учествувал со 40 отсто во увозот на гас во ЕУ, а денеска преку гасоводи учествува со девет отсто.
– Но, Русија продолжува активно да манипулира со нашиот енергетски пазар. Тие претпочитаат да согоруваат гас отколку да го доставуваат (во Европската унија). Овој пазар повеќе не функционира. Во исто време, климатската криза силно се рефлектира во нашите сметки. Топлотните бранови ја зголемија побарувачката за електрична енергија, а поради сушата беа затворени хидроелектричните и нуклеарните централи – објасни претседателот на ЕК.
Руската агенција забележува дека Фон дер Лајен не ги спомна санкциите воведени кон Русија, вклучително и ембарго за увоз на руски јаглен и нафта и обидите за ограничување на цената на рускиот гас, како причини за енергетската криза во Унијата.
