Актуелната градоначалничка на Скопје Данела Арсовска случила договор со маркетинт агенцијата Елемент Пи-ар од Скопје во вредност од 91.594 евра за „подготовка и имплементација на промоција на кампања за активностите на Град Скопје“, како што стои во договорот склучен на 31 август годинава.
Според Бирото за јавни набавки, каде што е објавен договорот, на тендерот се пријавила само една фирма, која е и победничка – фирмата Елемент ПР ДООЕЛ Скопје, со седиште на ул. „Миле Поп Јорданов“ во Скопје, а застапувана од уптавителката Татјана Лопарски. Износот на договорот е 5.651.389 денари со вклучен ДДВ, а страните се обврзуваат дека вредноста на договорот не мора да биде исцрпена.
Во склучениот договор се наведува дека маркетинг агенцијата се ангажира за подготовка и имплементација на промоција на кампањи за посебни проекти за активностите на Град Скопје во времетраење од една година. Истата фирма „Елемент ПР“, претходно ја водеше и кампањата за локалните избори на Арсовска, која настапи како независен кандидат, поддржана од најголемата опозициска партија ВМРО-ДПМНЕ.
Останува нејасно зошто градоначалничката има потреба од дополнителна фирма за промоција на активностите на Градот, со огглед на тоа што Град Скопје веќе има служба за односи за јавноста.
