Во кинескиот град Вухан, властите наредија тридневен полициски час за речиси милион луѓе во округот Џиангсија, откако забележаа четири асимптоматски случаи на инфекција со новиот коронавирус, јавува британски Би-би-си.
Во Вухан, град со 12 милиони жители, властите забележаа два асимптоматски случаи на инфекција во вторникот преку редовно тестирање. По пат на контакт се откриени уште два случаи. Набргу потоа, властите издадоа наредба за затворање. Жителите на округот Џиангсија мора да останат во своите домови три дена.
Во почетокот на 2020 година, Вухан стана познат ширум светот како првиот град во кој научниците го открија новиот коронавирус и првиот град во кој властите воведоа строги рестриктивни мерки.
Кина усвои стратегија за нулта толеранција за Ковид-19, во која големите градови воведоа строги ограничувања на јавниот живот и ги подложија жителите на масовни карантини во последните месеци, спротивно на актуелните трендови во светот кој во голема мера се враќа во нормален живот. .
Кина има забележано многу помалку смртни случаи од пациенти со Ковид-19 од многу други земји, но стратегијата се соочува со растечки отпор бидејќи и става тежок товар на земјата, јавува Би-Би-Си.
