Шпанската влада нема да им нареди на потрошувачите да ја ограничат потрошувачката на гас, изјави министерката за енергетика Тереза Рибера откако Шпанија соопшти дека ќе се спротивстави на предлогот на Европската унија за намалување на потрошувачката на гас.
„Нема да ја воведеме во закон обврската за поставување на температурата на домашните термостати“, рече таа во интервју за локалната радио станица Cadena SER. Владата сепак би препорачала луѓето да штедат енергија, рече таа. Таа додаде дека Владата ќе ја заштити и потрошувачката на гас во индустријата.
Министерката во средата рече дека нејзината влада ќе се спротивстави на предлогот на Европската унија за намалување на потрошувачката на гас, бидејќи земјата не е зависна од рускиот гас откако во минатото инвестираше во инфраструктура за складирање и втечнување гас.
Кој е планот на Европската Унија?
Европската комисија предложи доброволна цел за сите земји на ЕУ да ја намалат потрошувачката на гас за 15 отсто од август до март, во споредба со нивната просечна потрошувачка во истиот период во периодот 2016-2021 година.
Предлогот ќе му овозможи на Брисел да ја направи целта задолжителна во случај на проблеми со снабдувањето. Неколку земји како Австрија, Германија и Данска рекоа дека размислуваат за вонредни планови кои на крајот би вклучиле рационализирање на гасот. Планот на ЕУ наиде на отпор од другите земји-членки, вклучувајќи ги Полска и Унгарија.
Против одлуката протестираше и Португалија
Португалската влада нема да го поддржи планот предложен од Брисел во средата за намалување на европската потрошувачка на гас за 15 отсто за да се надмине можното намалување на руските испораки, изјави Жоао Галамба, државен секретар за животна средина и енергија.
„Португалија ќе се спротивстави“ на оваа „несразмерна“ мерка, рече тој во интервјуто за дневниот весник Публико објавено во четвртокот.
Предлогот на Комисијата „не е прилагоден на земјите кои не се меѓусебно поврзани“ со гасна мрежа како Португалија, објасни тој.
Португалија на тој начин се приклучи на ставот на Шпанија, чија министерка за еколошка транзиција, Тереза Рибера, се спротивстави на овој предлог, сметајќи го ниту „фер“ ниту „ефективен“.
