Данска планира наесен да понуди четврта доза од вакцината против Ковид на луѓето постари од 50 години, изјави во средата премиерката Мете Фредериксен, објавувајќи стратегија за борба против ширењето на болеста во наредните месеци.
Иако стапката на инфекција со Ковид е сè уште ниска, Данска забележа зголемување на случаите откако новата подваријанта на омикрон БА.5, која се чини дека се шири побрзо од другите варијанти, стана доминантна во оваа нордиска земја.
„Не сме изненадени што се појавуваат нови варијанти и што инфекцијата може да се шири побрзо, но сепак се случи порано од очекуваното. И затоа треба да реагираме и затоа постапуваме сега“, рече Фредериксен.
Таа додаде дека ранливите групи ќе можат да добијат бустер доза веќе следната недела.
