Селекторот на македонската фудбалска репрезентација Благоја Милевски, од претстојните натпревари во Лигата на нации очекува помладите фудбалери кои ќе добијат шанса за настап да ги покажат своите квалитети.
– Ќе ги искористиме овие натпревари да дадеме шанса буквално на сите и да имаме увид со што располагаме за она што ни следи во иднина. Се среќаваме со противници со изедначен квалитет, тука мислам и на Гибралтар кој во никој случај не смее да се потцени – рече Милевски на денешната прес-конференција.
Тој во првите четири кола од четвртата група Ц-сегмент во Лигата на нации нема да може да смета на повеќе репрезентативци, меѓу кои и стандардниот Аријан Адеми, додека капитенот Стефан Ристовски неизвесно е колку средби ќе пропушти.
Селекторот најави игра на победа на сите четири натпревари, а отсутниот поради повреда Ристовски, во улогата на капитен ќе го замени Енис Барди.
Македонските фудбалери циклусот во Лигата на нации ќе го почнат против Бугарија на 2 јуни, потоа следува гостувањето кај Гибралтар (5 јуни), а двата домашни натпревара се со Грузија (9 јуни) и Гибралтар (12 јуни).
