Газа се соочува со „критичен ризик од глад“, предупредија експертите за безбедност на храната, десет недели откако Израел воведе целосна блокада на палестинската територија, спречувајќи го влезот на храна, лекови, засолниште и гориво.
Во својот последен извештај, Меѓународната класификација за безбедност на храната (IPC), конзорциум од експерти што работи под покровителство на ОН, наведува дека има „сериозно влошување“ на ситуацијата во Газа во споредба со последната проценка во октомври 2024 година. Според податоците, 500.000 луѓе – еден од пет жители – се соочуваат со глад, додека клучните потреби за преживување се или исцрпени или ќе исчезнат во наредните недели.
„Целото население на Газа е под високо ниво на акутна прехранбена несигурност“, предупредува извештајот.
Блокадата беше воведена на почетокот на март, по завршувањето на првата фаза од привременото примирје, кое конечно беше прекршено кога израелската армија започна нов бран напади.
Хуманитарните работници на терен известуваат дека залихите се исцрпени, магацините се празни, а цените на основните прехранбени производи нагло скокнале. Лекарите и екипите за помош кои лекуваат неухранети деца сега ги делат оброците наменети за еден пациент меѓу две деца во обид да спасат што е можно повеќе животи.
„Залихите што ги донесовме за време на двомесечниот прекин на огнот сега се речиси потрошени. Од почетокот на годината лекувавме повеќе од 11.000 деца. Во наредните недели, се плашиме дека ќе бидеме сведоци на уште повеќе смртни случаи кај децата“, изјави портпаролот на УНИЦЕФ, Џонатан Крикс, од јужна Газа.
Организацијата за храна и земјоделство на Обединетите нации (ФАО) дополнително предупреди дека Газа е „непосредно“ изложена на ризик од глад, наведувајќи дека земјоделството е „на работ на целосен колапс“. Организацијата повика на итно укинување на израелската блокада.
Беззаконието во Газа исто така се влоши, бидејќи очајните граѓани и организираните групи го искористуваат хаосот што произлегува од тоа. Пекарниците управувани од Светската програма за храна се затворени, кујните кои служеа речиси еден милион оброци дневно повеќе не работат, а магацините на ОН се празни. Во некои делови од Газа, килограм компири и домати чини повеќе од 10 долари.
Директорот на одделот за педијатрија и акушерство во Медицинскиот центар „Насер“ во Кан Јунис, д-р Ахмед ал-Фарах, изјави дека секој ден се евидентираат помеѓу пет и десет нови случаи на тешка неухранетост кај децата.
„Гледаме екстремно тешки случаи. Неухранетоста кај децата е ужасна и видлива на прв поглед. Немаме што да им понудиме. Им требаат протеини, но ги нема. Се обидуваме да обезбедиме барем малку млеко во прав, но не можеме да направиме повеќе од тоа“, рече Фарах.
Израел неодамна предложи нов систем за дистрибуција на помош преку центри управувани од приватни компании и заштитени од израелската војска. Сепак, ООН одби да учествува, наведувајќи дека планот е несоодветен, тежок за спроведување и потенцијално нелегален.
Во својот извештај, IPC наведува дека помеѓу 1 април и 10 мај, дури 244.000 луѓе во Газа биле на највисоко ниво на несигурност во однос на храната – категорија пет, што означува „катастрофа или глад“. Според техничките критериуми, глад се прогласува кога се исполнети најмалку два од трите услови: екстремен недостаток на храна во 20% од домаќинствата, акутна неухранетост кај 30% од децата помеѓу шест месеци и пет години и смртност од најмалку две лица дневно на 10.000 жители поради глад и болести поврзани со неухранетост.
Иако условите за екстремен недостиг на храна се исполнети во Газа, другите критериуми за формално прогласување глад сè уште не се исполнети, што предизвикува загриженост кај хуманитарните работници дека прогласувањето глад би можело да дојде предоцна – кога веќе има премногу жртви.
Израелската блокада беше воведена со цел да се изврши притисок врз Хамас да ги ослободи 59-те заложници што ги држи од октомври 2023 година. Во понеделник, Хамас го ослободи последниот жив американско-израелски заложник, 21-годишен војник. Во нападот на Хамас во октомври 2023 година, беа убиени повеќе од 1.200 луѓе, претежно цивили, а 251 лице беше киднапирано. Оттогаш, повеќе од 52.000 Палестинци се убиени во израелските напади врз Газа, а големи делови од територијата се срамнети со земја.
Израелските власти тврдат дека Хамас ја пренасочува хуманитарната помош за воени цели и ги користи цивилите како човечки штитови, без да дадат никакви докази за своите тврдења, што Хамас категорично го негира, објавува „Гардијан“
