Зголемените контроли на Царинската управа резултираа со повисока наплата на приходи во износ од 35,4 милијарди денари остварени во 100 дена, што е за 9,2% или 3 милијарди повеќе од минатата година. Преку засилување на контролите е евидентиран зголемен пријавен увоз на цигари, возила и облека, изјави директорот на Царинска управа, Бобан Николовски, на трибината Платформа „100 проценти посветени за тебе“.
Тој рече дека затекнал крајно разочарувачка состојба во однос на контролите, а дека минимални биле функциите на царината во откривање на криминалот.
– Воспоставуваме ред при што во јули е остварена историски рекордна наплата на приходи во еден месец во износ од 12 милијарди денари или 16,6% повеќе од лани – рече тој.
Николовски информира и дека само во текот на август се покренати 18 дисципински постапки, а дел од овие активности се и неодамнешните апсења во рамки на Царинската управа од страна на МВР по налог на Јавното обвинителство.
– Бидете убедени дека новото раководство многу внимание посветува на внатрешната контрола. Управата е обемна институција со 1.200 вработени, со многу внатрешни испостави и многу гранични премини. Насоката е дадена, редот, работата и дисциплината се единствените критериуми според кои ќе се цени, за сѐ друго ќе има санкционирање како што и се случи – рече Николовски.
