Државниот санитарен и здравствен инспекторат (ДСЗИ) попладнево излезе со информација за спроведениот вонреден инспекциски надзор на Клиниката за детски болести, Клиниката за респираторни заболувања кај децата „Козле“ и на приватната здравствена установа Ехолаб – ординација по општа медицина, во врска со третманот и лекувањето на починатото 14-месечно бебе од Скопје.
Во извештајот се посочува дека детето било однесено кај матичниот лекар на 30 септември со симптоми на повраќање при што е утврдено дека нема температура, а грлото му било лесно зацрвенето и аускултаторно без наод на белите дробови. Истиот ден, во попладневните часови детето е однесено на Детската клиника заради перзистирање на повраќањето каде е прегледено од дежурен лекар специјалист, кој ја потврдил дијагнозата од матичниот лекар, а во специјалистичкиот извештај било наведено да се донесе наредниот ден на контрола и по потреба во секое време.
Кај матичниот лекар, наредната посета била на 3 октомври поради, според изјава на родител, пролонгирано повраќање, најмалку двапати дневно, и малаксалост. Повторно било прегледано со наод без температура, црвено грло, наод на бели дробови аускултаторно уреден. Поради перзистирање на состојбата со повраќање, истиот ден матичниот лекар направил итен упат за Детската клиника каде што е прегледано околу 15 часот и издадени се два упата за лабораторија и еден за гасни анализи.
„Истиот ден по добивање на резултатите повторно било прегледано од специјалист педијатар и дополнително биле издадени упати за лабораторија и за РТГ дијагностика. При преглед, наод на везикуларно дишење со пропратен наод на бронхитични хркулки обострано. РТГ наодот покажува нагласен бронховаскуларен цртеж билатерално, хипобазално и корелира со аускултаторниот наод. Ординирана и терапија и пратено на домашно лекување“, се наведува во извештајот на ДСЗИ.
На 4 октомври, самоиницијативно родителите го однеле детето во Клиниката за респираторни заболувања кај децата „Козле“ околу 11 часот, каде, по преглед од страна на лекар специјалист педијатар, е задржано на болничко лекување поради поставена дијагноза – bronchiolitis acuta.
„Во текот на хоспитализацијата направени се следните испитувања: 4 ацидобазни статуси, јонограм, CRP-2,5 хепатограм, уринарен статус- (кетони и леукоцити), брз хроматографски тест за антиген детекција, RSV (negativen) гликемија, искашлок за дренажен бактериолошки преглед, РТГ (рендген снимање) на бели дробови. Во тек на денот и покрај ординираната терапија се влошува здравствената состојба на детето, па затоа е префрлено на одделот за интензивна нега со зголемена кислородна поддршка. Поради прогресивно влошување на состојбата без одговор на дадената терапија, со прогресивен пад на кислородна сатурација, со клиничка и со лабораториска слика на тежок респираторен дистрес, дежурните доктори стапиле во контакт со ИМП (итната медицинска помош) и со дежурен доктор на ЈЗУ УК детски болести (Јавна здравствена установа Универзитетска клиника за детски болести) и во 03.20 часот со возило на ИМП, пациентот е префрлен на ЈЗУ УК детски болести. Испис на 5 октомври со дијагноза pneumonia massiva, bronchitis obstruens во напад“, се додава во извештајот.
Приемот на Детската клиника бил во 03:38 часот со Дг I 18 – pneumonia.
„Хоспитализирано во 03.47 часот на одделение за интензина нега и терапија. Со оглед дека било во исклучително тешка здраствена состојба побаран е и стварен контакт со ЈЗУ ИК ТОАРИЛУЦ – ОЕ КАРИЛ заради поставување на асистирано дишење. Од страна на анестезиолог е издаден изештај дека е пристапено кон реанимација, без успех, и настапува смртен исход, Исписна дијагноза e Bronchopneumonia obstructiva, Exitus letalis во 04.20 минути“, се појаснува во извештајот.
Телото било предадено на обдукција на Институт за судска медицина, криминологија и деонтологија. Од страна на ДСЗИ се иницира формирање на Комисија за стручен надзор.
