Израел потврди дека започнал копнена инвазија на Либан и извршил напади врз цели на Хезболах во јужната гранична област. Израелските сили издадоа предупредување до жителите на јужен Либан поради „жешките борби“ во областа, изјави воен портпарол , јавува Скај Њуз.
„Итно предупредување до жителите на јужен Либан. Во јужен Либан има тешки борби“, објави тој на мрежата Икс.
Исто така, Израел тврди дека Хезболах ги користи „цивилната средина и населението како жив штит“ за да изврши напади врз израелските сили.
Армијата апелира до жителите да не ги преместуваат своите возила од северниот дел кон јужниот дел на реката Литани.
Дописничката на Скај Њуз, Алекс Крафорд, кој е во Либан, рече дека предупредувањето може да значи дека израелските сили имаат намера да нападнат области јужно од реката. Таа рече дека се работи за површина од околу 850 квадратни километри со околу 20.000 жители.
Милитантната група Хезболах соопшти дека истрелала артилерија врз израелските сили во град во близина на границата меѓу Израел и Либан. Либанска милитантна група соопшти дека ги нападнала силите во Метула. Хезболах во својата изјава не ја спомена најавата на Израел за почеток на копнената инвазија.
На снимката објавена од дописникот на Скај Њуз се гледаат експлозии на границата меѓу Либан и Израел. Друга снимка го прикажува повлекувањето на либанската армија од границата со Израел. На силите на либанската армија им беше наредено да се поместат најмалку пет километри од границата.
Израелската армија бомбардирала куќа во јужниот либански град Даудија, при што загинале најмалку 10 лица, а петмина се повредени, јавува либанската национална новинска агенција, повикувајќи се на „Ал Џезира“. Сите убиени припаѓаат на семејството Диаб, според ННА.
Покрај Либан, најмалку два проектили „Качус“ беа истрелани врз воена база во која се сместени американските сили во близина на меѓународниот аеродром во Багдад во Ирак, изјавија за Ројтерс рано во вторникот двајца ирачки воени претставници. Противвоздушната одбрана ги пресретнала ракетите, велат тие.
Изворите рекоа дека првичната истрага покажала дека биле истрелани три ракети, вклучително и една што паднала во близина на згради што ги користат ирачките сили за борба против тероризмот, предизвикувајќи штета и пожар на некои возила.
Во меѓувреме, израелските сили влегоа во вторникот рано наутро во окупираниот град Наблус на Западниот брег, пукајќи куршуми и активирајќи експлозивни направи додека вршеа рации во домовите, објави новинската агенција Вафа.
Бројот на загинати во израелскиот воздушен напад врз Дамаск се искачи на три, а девет лица се повредени, објавија сириските државни медиуми. Претходно државната телевизија објави дека еден од нејзините водители, Сафа Ахмад, бил убиен во нападите.
