Разорните поплави во поголемиот дел од централна Европа и смртоносните пожари во Португалија се доказ за „климатски дефект“ што ќе стане норма доколку не се преземат драстични мерки, објави денеска европскиот комесар за хуманитарна помош и управување со вонредни состојби Јанез Ленарчич.
„Не се залажувајте, оваа трагедија не е аномалија. Тоа брзо станува норма за нашата заедничка иднина. Европа е најбрзо затоплувачкиот континент на глобално ниво и е особено чувствителна на екстремни временски услови“, рече Ленарчич пред пратениците на ЕУ во Стразбур.
Најлошите поплави во последните години ја погодија централна Европа во вторникот, одземајќи животи и уништувајќи имот. На другиот крај на ЕУ, во пожарите во северна Португалија загинаа најмалку шест лица.
Ленарчич предупреди дека покрај човечките жртви, државите се борат и против зголемените финансиски притисоци за поправка на штетите од итни случаи и катастрофи.
„Просечната цена на катастрофите во 1980-тите беше осум милијарди евра годишно. „Неодамна, во 2021 и 2022 година, штетата надмина 50 милијарди евра годишно, што значи дека трошокот за да не се преземе ништо е далеку поголем од цената на (превентивната) акција“, рече тој.
Тери Рентке, претседател на групата на Зелените во Европскиот парламент, рече дека трошоците за природните катастрофи во ЕУ, од 1980-тите до денес, се проценуваат на околу 650 милијарди евра.
ЕУ се бори да преземе брза акција за борба против климатските промени и се соочи со политичка опозиција во многу земји-членки, каде што политичката клима се свртува против еколошките прашања и мерките за обновување од катастрофи.
Планот на ЕУ да стане климатски неутрален до 2050 година се најде под голем притисок од критичарите, кои го нарекуваат нереален и прескап. Популистичките и екстремно десничарските партии ја направија клучна точка на напад врз институциите и земјите-членки на ЕУ.
