Полицијата од полскиот град Лублин во петокот известила за несекојдневен инцидент што се случил ден претходно, германски овчар паднал врз главата на 21-годишна девојка, а кучето скокнало врз неа од вториот кат на зградата.
Во необичниот судар за среќа никој не е тешко повреден, кучето веднаш станало и се оддалечило, а лекарите во болницата констатирале дека несреќното девојче не се здобило со поголеми повреди.
„Кучето најверојатно се исплашило од невремето и затоа скокнало од прозорецот на вториот кат од зградата и притоа паднало право врз девојката. И покрај тоа што на почетокот инцидентот изгледал сериозен, 21-годишната девојка не претрпела повреди опасни по живот или по здравјето“, извести управата на провинциската полиција во Лублин.
Сепак, сопственикот на кучето би можел да сноси многу сериозни последици доколку биде обвинет дека, како што официјално е наведено, „не постапил со должно внимание при чувањето на животното“.
„Во моментов се спроведуваат дејствија поврзани со изложување на лице на непосредна опасност од губење на животот или од сериозно оштетување на здравјето, за што е пропишана казна затвор до 3 години“, соопшти полицијата.
фото: VIDEO SCREENSHOT
