Вооружените сили на Украина се под голем притисок од руските напади на истокот на земјата, рече претседателот Володимир Зеленски во петокот во ноќното видео обраќање до нацијата.
Зеленски рече дека ситуацијата околу Покровско во Доњецката област била особено детално анализирана од военото раководство.
„Таа област беше и продолжува да биде во фокусот на руските напади“, рече Зеленски. Мора да се направи се за зајакнување на одбранбените позиции на Украина во регионот, додаде тој.
Украинскиот лидер изрази „посебна благодарност“ до сите војници кои ги нападнаа руските бази и логистика на окупираните територии, без да именува конкретни војници.
„Окупаторот мора да почувствува дека ова е украинска земја“, рече Зеленски.
Повикувајќи се на воени извори во Киев, украинските медиуми претходно објавија ракетен напад на воен аеродром на Крим, полуостров на Црното Море, анектиран од Русија во 2014 година.
Првично не беа дадени детали за ефектот од нападот. Руското Министерство за одбрана не го коментираше нападот.
Украинско разузнавање: Руските сили се фокусирани на нападите во Донбас
Забелешките на Зеленски дојдоа откако официјален претставник на украинската воена разузнавачка служба ХУР претходно во петокот изјави дека руските сили им даваат приоритет на нападите околу регионот Донбас во источна Украина.
„Тука моментално се водат најжестоките борби“, изјави претставникот на ХУР, Андриј Јусов на украинската телевизија.
Борбите се водат на речиси сите делови од фронтот околу регионот за производство на јаглен Донбас, рече тој.
„На сите други делови непријателот врши лажни напади и диверзивни маневри“, додаде тој.
Регистрирани се бројни лажни напади кои служат како мамка, особено во регионот јужно од градот Запорожје, рече тој. Во реалноста, сепак, тоа се должи на прегрупирање и прераспоредување на руска страна, според Јусов.
Овие операции не се без опасност, особено затоа што Русија има стационирано околу 90.000 војници во регионот Запорожје.
Според украинските воени експерти, овој број војници не е доволен за да се пробие линијата на фронтот, но украинската армија секако би можела да биде под притисок.
Нови руски напади врз украинските енергетски објекти
Во текот на ноќта Русија повторно ги нападна енергетските капацитети со беспилотни летала и проектили во други делови на Украина.
Снабдувачот со енергија Укренерго во петокот на Фејсбук објави дека се погодени објектите во регионите Житомир и Чернихив.
Снабдувањето со енергија за домаќинствата и индустријата во областа Житомир беше привремено прекинато, но главно беше обновено до петок наутро. Работите за поправка се во тек, рече тој.
Според украинските вооружени сили, Русија во нападот истрелала 22 беспилотни летала и најмалку една ракета Искандер-М.
ПВО соопшти дека пресретнале 20 дронови. Сепак, двете страни редовно известуваат за високи стапки на пресретнување, и покрај честите значителни штети на теренот.
Украинските медиуми објавија снимка од нападот во градот Краматорск во областа Доњецк. Властите се уште не објавија информации за штетата, а не е јасно дали ударот бил предизвикан од проектил Искандер.
