Мајките на Сребреница упатија остра порака до Делегацијата на Европската унија во Босна и Херцеговина, откако вршителот на должност на Европската унија во Босна и Херцеговина Адебајо Бабајде и дипломати од земјите-членки на ЕУ во БиХ положија венец на Воените гробишта во Братунац.
Најголемо внимание предизвика соопштението во кое се наведува дека за време на положувањето на венците „емпатијата и почитта кон сите невини цивилни жртви, како и прифаќањето на историските и судски утврдените факти се клучни за создавање амбиент погоден за помирување“.
По ова мајките од Сребреница бурно реагираа. Нивното соопштение го пренесуваме во целост.
„Господа, Европејци, не е исто. Не е исто да се дојде да им оддаде почит на жртвите на геноцидот, а потоа да им оддаде почит на оние што извршија геноцид. Не е и не може да биде. Вашиот однос кон жртвите на геноцидот е крајно лицемерен и навредлив. Свесни сме дека меѓу вас има и такви на кои не им е грижа, но барем почитувајте ги резолуциите на Европскиот парламент ако веќе не ги почитувате жртвите на геноцидот. Вашите постапки покажуваат недостаток на емпатија и разбирање за болката на преживеаните. Бараме од претставниците на Европската унија кои ги посетија гробиштата во Братунац да им се извинат на жртвите на геноцидот или да ја напуштат Босна и Херцеговина“, се вели во соопштението.
Покрај мајката на Сребреница, претходно реагираше и Емир Суљагиќ, директорот на Меморијалниот центар Сребреница Поточари и деканот на Факултетот за политички науки во Сараево, кој го осуди потегот на Делегацијата на ЕУ во БиХ, кој рече дека овој чин е почит на војската на Караџиќ и Младиќ, кои извршија воени злосторства и геноцид и кои брутално убиваа цивили во Братунац и Сребреница.
