„Останав конзистентен во политиката, влегов за да донесеме промени во албанскиот блок и тоа се случи“.
Ова го изјави денеска министерот за здравство, Арбен Таравари, кој е лидер на едно од крилата на Алијансата на Албанците, коментирајќи ја изјавата на Зијадин Села, кој го предводи другиот дел од членството.
Села вчера изјави дека Таравари по директива на премиерот и лидер на ВМРО-ДПМНЕ, Христијан Мицкоски, придонел за поделба на Алијансата за Албанците.
– Мислам дека многу конспирационо мисли. Не ми се допаѓаат тие параноидни идеи. Ние се знаеме девет години со него и мислам дека не му прилега тоа. Јас знам дека останав конзистентен во политиката, влегов за да донесеме промени во албанскиот блок и тоа се случи, додека г. Села, за жал, седна во скутот на г. Ахмети (Али Ахмети, лидер на ДУИ), рече Таравари.
Во однос на забелешките за албанското знаме во неговиот кабинет, Таравари рече дека во неговиот кабинет официјално има две знамиња како и во сите кабинети.
– Има мали знамиња на околу 20 држави, меѓу другите е и албанското знаме секако – рече Таравари.
