Најмалку седум лица загинаа во минување на ураганот Берил над југоисточниот дел на Карибите, а тој ураган денеска се „подготвува“ да ја погоди Јамајка, а потоа и Кајманските Острови, предупреди Американскиот центар за урагани (NHC).
Јачината на овој прв сезонски ураган во Атлантикот вчера беше намалена на категоријата четврта, од највисоката категорија пет, со ветрови над 252 километри на час и „потенцијални катастрофални последици“ што ги имаше вчера и понеделник.
Во Венецуела три лица загинаа како последица на ураганот, а уште најмалку три загинаа во Гренада, која во понеделникот ја погоди Берил, како и едно во Сент Винсент и Гренадини.
„Во среда во текот на денот и навечер во областа на Јамајка и Кајманските Острови се очекуваат разорни ветрови, потенцијално смртоносни бранови на вода и штетни бранови“, објави синоќа американскиот Центар за урагани (NHC). Како што се додава, ураганот е придружен со ветрови со брзина од 250 километри на час.
Директорот на NHC, Мајкл Бренан, рече дека добрата вест е што Берил почнал малку да слабее, но тој сепак го окарактеризира како „исклучително опасен“.
„Берил“ би можел да падне во Јамајка како ураган од трета или четврта категорија, што може да предизвика значителна штета на домовите, покривите, дрвјата и далноводите поради силните ветрови, рече тој.
Јамајканскиот премиер Ендрју Холмс ги повика жителите да складираат храна, батерии, свеќи и вода и да се засолнат на безбедно место со документи за кои не може да се патува.
Предупредувања за урагани се издадени и за Кајманските Острови, кои се очекува вечерва да бидат погодени од ураганот Берил, соопшти Американскиот центар за урагани.
Во Доминиканската Република огромни бранови се урнаа на брегот на главниот град Санто Доминго, покажуваат фотографиите на агенцијата АФП.
Берил, исто така, ќе го погоди јужниот дел на Хаити и ќе стигне до полуостровот Јукатан во Мексико во ослабена форма во четврток навечер.
„Јасно е дека климатските промени предизвикуваат катастрофи до нови рекордни нивоа на уништување“, рече шефот на ОН за климата, Сајмон Стил.
Тој рече дека климатската криза оди од лошо кон полоша и побрзо од предвиденото, поради што е потребна поамбициозна климатска акција од страна на владите и компаниите.
Берил е првиот ураган во сезоната во Атлантикот. Временски феномен од оваа големина е многу редок толку рано во сезоната на урагани во САД, која трае од почетокот на јуни до крајот на ноември.
Американската метеоролошка опсерваторија NOAA предвиде на крајот на мај исклучителна сезона и можност од четири до седум урагани од категорија трета или повеќе. Тие прогнози се поврзани со очекуваниот развој на метеоролошкиот феномен Ла Ниња, како и многу високите температури на Атлантскиот Океан, според NOAA.
