Рускиот претседател Владимир Путин во петокот изјави дека Русија ќе влезе во мировни преговори доколку Украина се откаже од амбициите да се приклучи на НАТО и ги повлече своите сили од четирите украински региони на кои претендира Москва.
Путин рече дека Русија е подготвена да гарантира безбедно повлекување на украинските војници за да се случи тоа, пренесува Ројтерс.
Рускиот претседател ова го изјави во пресрет на самитот во Швајцарија на кој повеќе од 90 земји и организации треба да разговараат за можниот пат кон мирот во Украина. Русија не е поканета и вели дека собирот е губење време.
Покрај мировната понуда, Путин денеска изјави и дека светот се приближил до точката од која нема враќање и дека НАТО се обидува да го зголеми притисокот врз оние земји чиј развој се обидува да го заузда, пренесуваат руските медиуми.
