Русија во текот на ноќта истрела десетици проектили и беспилотни летала над Украина, од кои повеќето беа пресретнати од украинската војска. Слично на тоа, руската војска објави дека ноќе соборила 87 украински беспилотни летала над нивна територија, јавуваат странските агенции.
Украинската воздушна одбрана во текот на ноќта собори седум проектили и 17 беспилотни летала, соопшти украинската армија. Вкупно Русија лансираше 31 ракета и беспилотни летала. Цели на нападот, меѓу другите, биле и регионите Запорожје, Одеса и Дњепропетровск, јавува украинската новинска агенција Укринформ.
Руската војска соопшти дека во текот на ноќта соборила 87 украински беспилотни летала, а 70 од нив биле насочени кон цели во регионот Ростов. Како резултат на нападите, во неколку области беше прекинато снабдувањето со електрична енергија. Во Воронеж, остатоците од беспилотните летала го оштетиле резервоарот за гориво, пренесува француската новинска агенција АФП.
Според последните информации, овој пат немало жртви, но во четвртокот во напад на украински беспилотно летало загинал руски новинар, а уште еден бил ранет. Нападот се случил во источниот регион Доњецк во село под контрола на Русија.
