Новиот филм за Доналд Трамп, „Приправник“ (The Apprentice), вчера ја имаше својата светска премиера на Канскиот филмски фестивал, привлекувајќи главно добри оценки од критичарите, но и закани за правни последици од поранешниот претседател на САД, објави Еј-Пи њус.
Филмот е издаден додека судењето на Трамп во Њујорк сѐ уште трае, како и во пресрет на претседателските избори во САД во ноември.
Насловот за филмот е преземен од натпреварувачкото бизнис-реално шоу на Трамп, додека тој беше познато ТВ-лице, но приказната почнува во 1980-те.
Авторот, иранско-данскиот режисер Али Абаси, претставува неколку брутални настани што наводно се случиле зад затворени врати. Во една од сцените, Трамп ја силува Ивана. Директорот за комуникации на кампањата на Трамп, Стивен Чеунг, изјави дека ќе бидат преземени правни дејствија за „лажните тврдења“ од филмаџиите.
– Ова ѓубре е чиста фикција којашто ги сензационализира лагите што одамна се разоткриени. Ова е мешање во изборите од страна на холивудските елити, коишто знаат дека претседателот Трамп повторно ќе ја преземе Белата куќа и ќе го победи нивниот избраник бидејќи ништо што тие направиле не функционирало – нагласи Чеунг.
Абаси одговори на обвинувањето пред новинарите во Кан.
– Тимот на Доналд треба да почека, прво нека го погледнат филмот пред да почнат да нѐ тужат – рече Абаси.
Премиерата на „Приправник“ на францускиот Филмски фестивал се одржа во денови кога на Трамп сѐ уште му се суди на Менхетен. Тој, патем, одрече дека фалсификувал извештаи за да ја прикрие исплатата кон порноѕвездата Сторми Даниелс во врска со наводните сексуални средби.
