Очекуваме победата на нашиот кандидат за претседател Бујар Османи да биде историски голема, рече портпаролот на ДУИ, Арбр Адеми, на денешната прес-конференција веднаш по завршувањето на изборниот процес во 19 часот.
Тој истакна дека кампањата на Османи била исклучително европска и дека се задоволни од досега постигнатото.
– Народот го кажа своето. Сѐ уште е рано да се зборува за резултатите од гласањето, но нашите информации говорат дека постигнавме историски голема победа. Им се заблагодаруваме на новинарите, на медиумите, како и на сите активисти во штабовите на сите нивоа. Имавме фер и слободни избори. Ова е наш заеднички успех. Покажавме демократска зрелост како што ѝ доликува на земја членка на НАТО и земја кандидат за членка во ЕУ – рече Адеми.
Османи претходно изјави дека ова се одлучувачки избори по однос на иднината на државата.
– Граѓаните се исправени пред две опции, изолацијата или интеграцијата. Очекувам да ја донесат вистинската одлука – рече Османи утринава.
