Падот на побарувачката за германски хемиски производи го допре дното, но сè уште е рано да се извлечат заклучоци за закрепнување, изјави во петокот извршниот директор на хемиската групација БАСФ, Мартин Брудермулер, предупредувајќи дека компаниите изгубиле една петтина од побарувачката во последните две години.
„Ги гледаме крајните линии“, рече Брудермилер во интервју за швајцарскиот „Ноје Цуерхер Цајтунг“ (НЗЗ).
„Цените и обемот на продажба повеќе не паѓаат. Но, сè уште не би зборувал за вистинско опоравување. За почеток, среќни сме што работите повеќе не одат надолу“, додаде Брудермилер.
Одговарајќи на прашање за инвестицијата на БАСФ од 10 милијарди евра во нова фабрика во Кина и паралелното реструктуирање во нејзината родна Германија, тој нагласи дека лани заработиле на сите пазари освен во Германија.
„За жал, настрада конкурентноста на Германија. Во изминатите две години, германската хемиска индустрија загуби повеќе од 20 отсто од побарувачката (…) и моравме да реагираме“, објасни тој.
„Кина веќе сочинуваше повеќе од половина од светскиот хемиски пазар во 2023 година, со растечки тренд, а до 2030 година ќе биде извор на 80 отсто од растот на обемот на продажбата“, додаде тој.
Во март здружението на германската хемиска индустрија VCI процени дека годинава очекува пад на приходите од 3,5 отсто и стабилизирање на производството на ниско ниво поради високите трошоци и слабата побарувачка.
Секторот беше особено тешко погоден од поскапувањето на гасот поради руската инвазија на Украина и санкциите на Западот против Москва. Цените на бензинот денеска паѓаат, но според податоците на германскиот завод за статистика, тие сепак биле за 45,4 отсто повисоки во втората половина од минатата година отколку во втората половина на 2021 година, пред војната во Украина.
