Косовскиот премиер Албин Курти денеска при посетата на Глоговац изјави дека против Србија се подготвува тужба за злосторства извршени за време на војната во Косово, пишува српска Република.
Според Курти, во тек се подготовки за обвинување на Србија како земја за злосторства против човештвото и геноцид.
– Во тек се подготовките да се обвини Србија, како земја, дека е одговорна за злосторствата извршени за време на војната во Косово, за злосторства против човештвото и геноцид – рече Курти.
Курти ја истакна важноста од ангажирање на Државното обвинителство во гонењето на осомничените за кривични дела, нагласувајќи дека правдата мора да биде задоволена за да се залечат раните кои останале отворени, додавајќи дека за сето тоа има живи сведоци.
– Без правда, само со вистината, раните остануваат отворени – рече Курти.
Сето ова доаѓа откако претседателот на Србија, Александар Вучиќ, презентираше загрижувачки податоци за бројот на етнички мотивирани напади врз Србите и српската црква откако Курти дојде на власт во 2021 година.
Според Вучиќ, оттогаш се забележани дури 494 напади, што е значително повеќе во споредба со претходниот деветгодишен период кога Курти не беше на власт и кога беа забележани 170 напади помалку. Овие податоци јасно укажуваат на ескалација на тензијата и насилството на Косово и Метохија по доаѓањето на Курти на политичката сцена.
– А во претходниот период од девет години, кога Курти не беше на власт, имавме само уште 170 напади – изјави Вучиќ.
