Израелскиот премиер Бенјамин Нетанјаху изјави дека Израел нема да ги прифати барањата на Хамас за прекин на огнот.
Доцна синоќа Хамас го отфрли најновиот предлог за примирје и во соопштение рече дека ги информирал посредниците дека ќе се држи до својот првичен став, кој вклучува крај на војната и целосно повлекување на Израел од Газа.
Нетанјаху во денешната изјава го обвини Хамас дека не е заинтересиран за продолжување на преговорите за договорот.
Тој наведе и дека одбивањето на Хамас е „несреќно сведоштво за штетата на одлуката на Советот за безбедност на Обединетите нации“, кој вчера усвои резолуција со која се бара итен прекин на огнот и ослободување на сите заложници заробени од Хамас.
Нетанјаху рече дека Израел „нема да попушти“ на „заблудените“ барања на Хамас и ќе продолжи да работи на уништување на воените и управувачките способности на милитантната група, како и да бара ослободување на заложниците.
Израелскиот министер за надворешни работи Израел Кац рече дека усвојувањето на резолуцијата го охрабри Хамас да го отфрли последниот предлог за прекин на огнот.
Кац изјави за израелското армиско радио дека резолуцијата на Обединетите нации му покажала на Хамас дека меѓународниот притисок врз Израел се зголемува и дека треба само да чека војната да заврши преку тој притисок и да не се согласи на никакви отстапки.
„Пораката што вчера му беше доставена на Хамас е – не треба да брзате“, рече Кац.
Тој, исто така, ги критикуваше САД, најголемиот сојузник на Израел, што не стави вето на резолуцијата.
