Португалската фудбалска репрезентација во понеделник навечер допатува во Љубљана каде ќе одигра пријателски натпревар против Словенија. Ова е првпат Кристијано Роналдо да пристигне во Словенија, а тоа предизвика огромен интерес меѓу фудбалските фанови.
На аеродромот и пред хотелот во Љубљана очекувано се собра толпа навивачи на португалскиот фудбалски ас, но тие останаа разочарани.
На аеродромот „Јоже Пучник“ се собраа голем број обожаватели на Кристијано Роналдо, меѓу кои претежно деца, со надеж дека ќе го видат славниот фудбалер.
Но, поради посебни безбедносни мерки, бројните фанови не можеа да им се приближат на португалските фудбалери.
По слетувањето на авионот, на пистата чекал автобус со полициска придружба и ги превезол до хотелот.
Репрезентативците на Португалија ноќта ја минаа во елитен хотел во центарот на градот, каде исто така имаше голема гужва, но навивачите ни тука немаа шанса да им пријдат.
Најавено е дека португалските репрезентативци ќе останат во хотелот до натпреварот, каде што го резервираа целиот кат и ќе бидат строго одвоени од останатите гости и со специјално обезбедување.
Роналдо против Словенија ќе го одигра својот 206. натпревар за португалската репрезентација. Досега има постигнато 128 гола за својата земја.
Билетите за натпреварот на стадионот „Стожице“ кој започнува во 20 часот и 45 минути се распродадени за само 4 минути.
