Соединетите Американски Држави се зафатени од бури. На места беа придружени со снег, а на други торнада. Според последните податоци, забележани се најмалку осум од нив. Пријавени се повеќе повредени, а причинета е и материјална штета.
Времето во централниот дел на САД беше многу нестабилно во средата и четвртокот. Неколку бури ја погодија областа, некои придружени со снег, други со торнада.
Предупредувањето за торнадо беше на сила во четвртокот вечерта за вкупно повеќе од 13 милиони луѓе, а најмалку осум пријавени за неколку часа.
Еден од нив направил голема штета во Винчестер, Индијана, каде, според полицијата, многу луѓе се здобиле со сериозни повреди. Има информации и за тројца загинати, кои се уште не се потврдени од полицијата.
Во Селма, град оддалечен 25 километри, со 750 жители, невремето наводно оштетило 50 отсто од сите згради, а службите за итни случаи забележале само полесни повреди меѓу луѓето.
Неколку торнада кои придружуваа многу бури беа пријавени и од Охајо, каде што едно го погоди градот Лејквју, меѓу другите. Според жителите на околината, пустошот бил огромен. Торнада беа забележани и во окрузите Галатин и Тримбл во Кентаки, но според гувернерот Енди Бешеар, нема жртви.
Според податоците на надлежните служби, во трите погодени држави изутрината без струја биле 50.000 домаќинства. Многу училишта денеска ќе останат затворени. Иако е тешко да се предвидат торнада, тие се релативно чести во САД, особено во централните и јужните делови на земјата.
Додека торнада беснееја низ централниот дел на САД, државата Колорадо беше погодена од една од најтешките снежни бури во последните години. До петок наутро, се предвидуваше речиси еден метар свеж снег во областа. Поради обилните снежни врнежи, надлежните затворија дел од автопатот, а на жителите им се препорачува да останат дома.
