Сексуално преносливите инфекции се интензивираа низ Европа во 2022 година, при што бројот на пријавени случаи на гонореја скокна за речиси половина, соопшти Европскиот центар за превенција и контрола на болести, објавувајќи ги најновите податоци во четвртокот.
Бројот на заболени од сифилис е зголемен за 34 отсто во споредба со претходната година, на повеќе од 35.000 заразени, а случаи на кламидија за 16 отсто, на повеќе од 216.000. Случаите со гонореја скокнале за 48 проценти на повеќе од 70.000.
„Бројките даваат јасна слика, онаа на која и треба нашето итно внимание и акција“, рече директорот на ECDC Андреа Амон на прес-конференција.
Нелекуваните инфекции може да доведат до низа здравствени проблеми, вклучувајќи хронична болка, неплодност и, кај сифилис, невролошки и кардиоваскуларни компликации.
Случаите на lymphogranuloma venereum (LGV) и вроден сифилис, кога инфекцијата се пренесува од мајка на фетус, исто така нагло се зголемија, рече ECDC, иако од пониски нивоа.
Стапките на СПБ се зголемуваат со години во голем број земји, вклучително и Европа, иако тоа беше запрено од пандемијата на СОВИД-19 бидејќи повеќето влади воведоа мерки за социјално дистанцирање, луѓето останаа дома и стапките на пријавување паднаа.
Бројни инфекции остануваат неоткриени
Голем број причини стојат зад континуираниот раст, рече ECDC, вклучително и подобар надзор и зголемување на домашно тестирање, како и зголемување на поризичното сексуално однесување.
Според најновите податоци, скокот на бројот на инфекции кај младите хетеросексуалци, особено кај младите жени, може да биде резултат на промена во сексуалното однесување по пандемијата, наведува агенцијата на ЕУ.
Таа, исто така, рече дека сè уште нема докази дека зголемувањето на инфекциите со гонореја е предизвикано од антимикробна резистенција, но рече дека ќе продолжи да се следи. Амон рече дека бројките се веројатно „врвот на ледениот брег“, бидејќи многу инфекции остануваат неоткриени.
Европските земји мора да се фокусираат на тестирање, лекување и превенција, рече таа, а поединците мора да преземат чекори за да се заштитат, особено со употреба на кондоми, пренесува Ројтерс.
