Ако, и покрај диетите, не можете да ослабете, можеби треба да проверите дали хормоните ви се во ред.
Веќе некое време се обидувате да ослабете, сте пробале различни диети, но нема резултати. Можеби причина за се се хормоните, пишува Запоџена.хр.
д-р. Олга Личина, клинички нутриционист, вели дека флуктуацијата од неколку килограми во текот на циклусот е нормална за жените. Меѓутоа, ако имате необјаснето зголемување на телесната тежина или се борите да изгубите тежина, една од првите работи што треба да ги проверите се вашите хормони. Тие регулираат многу важни процеси во телото, вклучително и губење на тежината.
„Кога имате дијагностицирана состојба како PCOS (синдром на полицистични јајници), ендометриоза, цисти на јајниците, задолжително проверете ги вашите полови хормони“, вели докторката на нејзиниот профил на Инстаграм.
Инсулин
Инсулинот се лачи во големи количини после оброк богат со енергија, особено со јаглехидрати, и помага енергијата во форма на гликоза да стигне до клетките. Инсулинската резистенција се јавува кога клетките имаат потешкотии да реагираат на инсулинот, а резултатот е метаболички проблеми и зголемување на телесната тежина, вели д-р Личина.
Тироидната жлезда
Тироидните хормони влијаат на речиси секој аспект од метаболизмот на вашето тело. Поради ниското ниво на тироиден хормон се јавува проблем со слабеење и се акумулира масното ткиво.
Кортизол
Кортизолот е познат како хормон на стрес, односно одговор на стресни ситуации. А кога сте во постојана состојба на „борба или бегање“, ќе се стимулира метаболизмот на мастите и јаглехидратите, создавајќи дополнителна енергија како потреба за преживување. Како резултат на тоа, се зголемува апетитот, но често и потребата за прејадување во текот на ноќта.
Естроген
Многу жени забележуваат зголемување на салото на стомакот како што стареат, дури и ако нивната тежина е иста. Ова се случува затоа што падот на нивото на естроген, кој вообичаено се јавува околу 40-тата година од животот, влијае на тоа каде мастите се распределуваат во телото.
Тестостерон
Кај мажите, ниското ниво на тестостерон доведува до зголемување на масните наслаги и губење на мускулната маса. Од друга страна, вели д-р Личина, високото ниво на тестостерон кај жените е поврзано со хормонални проблеми како PCOS и следствено со зголемување на телесната тежина и потешко губење на тежината.
