„Затвор во затвор“ со строги услови каде „Русија е зад решетки“. Вака затворениците од колонијата Харп на Арктикот го опишуваат најсеверниот затвор во земјата, каде лежеше рускиот опозиционер Алексеј Навални сé до својата смрт. Си-Ен-Ен објави снимки од ќелијата. Навални 27 пати бил во самица.
Затворениците дале изјави за рускиот опозициски медиум „Медуза“. Еден од нив вели дека се сомнева дека медицинскиот персонал веднаш му дошол на помош на Навални.
– Не верувам, едноставно е нереално – вели поранешниот затвореник кој бил ослободен во 2018 година.
Навални почина во затвор на 16 февруари под неразјаснети околности, служејќи 19-годишна казна. Затворот во Харп, во руската автономна област Јамало-Ненец го нарекуваат и Поларен волк.
Федералното биро за затвори брзо по објавувањето за веста за смртта напишаа дека „причината се утврдува“, додека „Русија Денес“ излезе со објаснување дека Навални починал од згрутчување со крвта.
– Кога прочитав дека наводно починал од згрутчување на крвта, им кажав на моите момчиња дека го убиле – вели еден поранешен затвореник на ИК-3, потсетувајќи се на својата реакција на веста за смртта на Навални.
Затвореникот кој бил интервјуиран поминал пет години во одделението ИК-3. Тој вака го опишува просторот:
– Целиот објект е покриен со габи, вклучувајќи го и ходникот. Има габа што расте од подот.
Постојат делови од ИК-3 резервирани за затвореници кои се под уште построги ограничувања од СУС. Ова вклучува одделение што содржи „простории со една ќелија“ (ЕПКТ), во кои затворениците се испраќаат како казна за „постојано кршење“ на затворските прописи.
Затворските службеници го префрлија Навални во ЕПКТ за период од една година во септември 2023 година. Рускиот опозициски политичар Владимир Кара-Мурза, кој одлежува 25 години затвор поради спротивставување на војната на Русија против Украина, наводно бил префрлен во ЕПКТ во јануари оваа година.
Околу телата на починатите во ИК-3, поранешен затвореник вели дека „малку тела се преземени, бидејќи е скапо“.
Најблискиот аеродром е во Салехард, град оддалечен 50 километри. Покрај тоа, патот што води од градот до затворот ја преминува реката Об и нема мост, оставајќи ги летните скелиња или зимскиот леден пат како единствени опции за премин.
Ако никој не дојде да го земе телото на затвореникот ИК-3, го закопуваат на локалните гробишта. Гробовите на поранешните затвореници обично се обележани со дрвени крстови.
Соработниците на Навални ја потврдија неговата смрт попладнето на 17 февруари. Повеќе од 48 часа подоцна, тие се уште се борат да ги натераат властите да го предадат неговото тело на неговото семејство.
