Утринава израелските сили пукале во главната болница на југот на Појасот Газа, при што загинал еден пациент, а шест се ранети, соопштија болнички извори.
Армијата се обидува да евакуира илјадници раселени лица од тој објект, кој беше главно изолиран поради неколкунеделниот конфликт.
Во меѓувреме, разговорите за прекин на огнот во Газа се чини дека се во застој, бидејќи израелскиот премиер Бенјамин Нетанјаху најави дека офанзивата ќе продолжи се додека Хамас не биде уништен и десетици заложници земени за време на воените напади на јужна израелска територија не се ослободат.
Болницата Насер во Кан Јунис беше најновиот фокус на воените операции кои направија хаос во здравствениот сектор во Газа, бидејќи се обидува да се грижи за десетици пациенти ранети во секојдневното бомбардирање.
Израел го обвинува Хамас дека користи болници и друга цивилна инфраструктура за да ги заштити своите борци.
На видеото по нападот на болницата, се гледаат медицински лица кои се обидуваат да ги префрлат пациентите на носилки низ коридор полн со прашина и чад.
Тие користат батериски ламби за мобилни телефони за да ја осветлат темната просторија каде што ранет маж вреска од болка додека надвор се слушаат пукотници.
Асошиетед прес сепак не можеше да ја потврди автентичноста на видеата.
Еден од преостанатите хирурзи во болницата, д-р Калед Алсер, изјави за АП дека седум пациенти кои беа погодени утрово се лекуваат таму.
Самиот тој беше полесно ранет во средата кога, како што рече, на горните катови на болницата пукаше од дрон.
„Ситуацијата ескалира секој час, секоја минута“, рече докторот.
Израелската армија во средата соопшти дека отворила безбеден коридор за раселените лица да ја напуштат болницата, но ќе им дозволи на лекарите и пациентите да останат.
На видеата објавени на социјалните мрежи, може да се видат десетици луѓе како ја напуштаат болницата носејќи ги своите најпотребни работи.
Армијата нареди евакуација на болницата во јануари, но како и во другите здравствени установи, лекарите и пациентите не можеа безбедно да ја напуштат или да се преселат на безбедно место. Затоа илјадници раселени од конфликтот во други области останаа во или во близина на болницата.
Палестинците велат дека нема безбедно место на опколената територија бидејќи Израел продолжува да ги напаѓа сите делови на Газа.
Претставникот на организацијата „Лекари без граници“ кои работат во таа болница, рече дека Палестинците се во невозможна ситуација и дека не знаат дали да останат и да бидат потенцијална цел или да одат дури и таму каде што бомбардирањето е дел од секојдневниот живот.
