Најмалку две лица се повредени во пожар што избувна по експлозија во фабрика за полимери во рускиот град Шакти во Ростовската област, јавија руските медиуми.
Како што објави на Телеграм, Ектареина Стењакина, пратеничка во руската Дума од Ростовската област, експлозијата се случила во фабриката за полимери „Авангард“.
„Се уште ги утврдуваме сите детали. Станбените згради не беа погодени, но фабриката претрпе штета. Пожарот предизвикан од експлозијата сè уште не е изгаснат“ – објави Стењакина.
Таа додаде дека нема загинати, но две лица се пренесени во болница. Работниците во фабриката се евакуирани.
Руското Министерство за вонредни ситуации соопшти дека пожарот избувнал во фабрика во населбата Гидропривод во градот Шакти. Фабриката Авангард, инаку, произведува полимерни пломби за душеци и перници.
Причината за пожарот сè уште не е позната.
