Иранската револуционерна гарда (ИРГЦ) објави дека вчера нападнала цели во северен Ирак и Сирија со балистички ракети. Нападот бил како одмазда за неодамнешните терористички напади во Иран, објави порталот на ИРГЦ.
ИРГЦобјави дека терористичката милиција на Исламската држава (ИД) е „лоцирана на окупираните територии во Сирија и уништена е со истрелување на серија балистички ракети“.
Речиси истовремено, малку пред полноќ, неколку силни експлозии го потресоа северниот ирачки град Ирбил. Очевидци изјавија дека неколку проектили паднале во близина на американскиот конзулат во изградба.
Погоден е и меѓународниот аеродром во тој курдски град. ИРГЦ објави дека ударите предизвикале „уништување на шпионскиот штаб на ционистичкиот режим (Мосад)“. Директорот на меѓународниот аеродром во Ирбил во изјавите рече дека летовите се одвиваат нормално.
Безбедносни извори во Ирбил изјавија за ДПА дека „ирански проектили паднале на фарми северно од Ирбил и ги погодиле домовите и имотот на граѓаните“.
Портпаролот на американскиот Стејт департмент, Метју Милер, на платформата X рече дека САД „силно ги осудуваат иранските напади во Ирбил и изразуваат сочувство до семејствата на жртвите“.
„Ние се противиме на дрските ракетни напади на Иран и ги поддржуваме напорите на владата на Ирак и на регионалната влада на Курдистан да ги исполни очекувањата на ирачкиот народ“, додаде Милер.
Ситуацијата во регионот е исклучително напната од избувнувањето на војната во Газа пред повеќе од три месеци.
Досега немаше ракетни напади на ИРГЦ, но милитантните групи сојузници со Иран често напаѓаа цели во Сирија и Ирак во последните месеци. Израел и САД се сметаат за најголеми непријатели на Иран од Исламската револуција во 1979 година.
Повеќе од 90 луѓе загинаа во терористички бомбашки напад на почетокот на јануари во Иран. Набргу потоа ИД ја презеде одговорноста за нападот. На 25 декември, висок офицер на ИРГЦ беше убиен во Сирија во наводен израелски воздушен напад. Техеран тогаш најави одмазда.
