Српскиот политичар Срѓан Ного денеска објави ново видео, во кое отвора нови дилеми и прашања за истрагата за убиството на малолетната Вања Ѓорчевска и пензионерот Панче Жежовски и најавува нови објави во следниве денови.
Ного, кој важи за ектремен десничар и член на партијата „Двери“, јавно преку својот профил на платформата „Х“ (Твитер) постави прашања до министерот за внатрешни работи Оливер Спасовски и до јавниот обвинител Гаврил Бубевски.
„Зошто инспекторите на МВР уште на 29 ноември се распрашувале дали Љупчо Палевски – Палчо и Алексанад Ѓорчевски се познаваат и дали биле во контакт? Во тоа време, на 29 ноември, нити некој беше уапсен ниту беа пронајдени телата на Вања и Панче“ – прашува српскиот политичар.
Во своето видео тој сугерира дека не полицијата, туку таткото на Вања, кој неправедно бил сатанизиран од МВР, им открил на инспекторите дека Палевски е можниот киднапрер и убиец на Вања. Односно дека тој ги поврзал и ги решил прашањата од истрагата, за што наводно, постојат снимки од разговори меѓу него и инспекторите, кои Ного ги поседува и има намера да ги објави!?
Ного најавува дека ќе објави нови снимки на неговиот канал на Јутјуб в сабота во 12 часот, на кои можат да се видат екклузивни снимки на киднаперите пред и по киднапирањето, снимки на Панче Жежовски на бензинска пумпа, снимени разговори и друго.
Останува отворено прашањето како се случило снимки, кои би требало да се дел од истрагата на МВР, да завршат во рацете на овој српски политичар и што има МВР да каже или дали некако ќе постапи во врска со тоа?
