Катастрофална сообраќајна несреќа се случи во Турција, а локалните медиуми јавија дека во верижен судар на северозападот од земјата загинале 11 лица, а повеќе од 57 се повредени.
Во верижната несреќа учествувале седум возила, меѓу кои три автобуси и камион на автопатот Северенa Мармара во близина на населбата Дагдиби во провинцијата Сакарија.
Предните делови на автобусот се речиси смачкани, а спасувачките екипи ги изнесуваат телата на настраданите. Автомобилите се целосно уништени. На терен се голем број полицајци, пожарникари и медицински техничари.
Причината за несреќата сѐ уште не е позната, јавуваат турските медиуми. Известено е дека подрачјето е покриено со густа магла и видливоста е исклучително слаба, а патиштата се речиси непроодни. Гувернерот на Сакарија, Јашар Карадениз за локалните медиуми изјави дека 57 лица се повредени и пренесени во болница, а седуммина се во тешка состојба.
„Според првите сознанија, најголем број загинати во несреќата предизвикал третиот автобус кој удрил во патниците кои излегле од возилото. Полицијата е на лице место и истрагата е во тек“, изјави Карадениз.
