Пилулата за контрацепција е создадена во 60-тите години на минатиот век, а е наменета за жени. За мажите, кондомите и вазектомијата се единствените опции за контрацепција, односно превенција од несакана бременост. Тоа полека се менува и за прв пат американските научници успеаја да развијат ефикасна таблета против бебиња за машки глувци.
Контрацептивните таблети за жени содржат комбинација од хормоните естроген и прогестерон, што ја спречува овулацијата, а со тоа и бременоста. Методот е ефикасен, но има несакани ефекти, пишува Dutsche Welle, пренесува N1 Zagreb.
Додека работеле на контрацептивните таблети за мажи, научниците прво се фокусирале и на хормоналниот метод, обидувајќи се да го запрат производството на тестостерон. Сепак, овој процес имаше несакани ефекти и предизвика депресија, вишок килограми и зголемен ризик од кардиоваскуларни болести.
Затоа се верува дека таблетите кои не делуваат хормонски можат да бидат поефикасни и побезбедни.
Намален број на сперматозоиди
Витаминот А е првенствено одговорен за таканаречената сперматогенеза, односно процесот на производство на сперма.Иновативен метод на контрацепција би влијаел на протеините кои се одговорни за производство на машки полови клетки.
Тестирањето на глувци покажало дека по четири недели орално консумирање на новата состојка YCT529, бројот на сперматозоиди е намален, што е дури 99 отсто ефективно за спречување на бременост.
Процесот не е траен, така што четири до шест недели по прекинот на земање на пилулата, плодноста се враќа. Не се пријавени никакви несакани ефекти, рече коавторот на студијата Абдула Ал Номан од Универзитетот во Минесота.
Сега, научниците сакаат да ги претстават овие нови откритија на Американското хемиско друштво, за да можат да започнат со тестирање на мажи на крајот на оваа година.
Професорката Гунда Џорџ, која учествувала во тој проект, смета дека пилулата против бебиња за мажи би можела да стигне на пазарот во следните пет години.
„Нема гаранција дека се ќе биде успешно, но би бил изненаден доколку пилулата не делува кај луѓето“, рекол Џорџ.
Колку е навистина ефикасна и безбедна пилулата?
Клиничките испитувања на луѓе ќе покажат дали новата пилула ќе биде безбедна и ефикасна. Протеинот на кој делува таблетата не е само одговорен за развојот на спермата, туку и за клетките во телото воопшто.
На резултатите од оваа студија се гледа со скептицизам во научните кругови. Иако американскиот тим не забележал никакви несакани ефекти кај глувците, не е невозможно тие да ги нема кај луѓето, изјави Ричард Андерсон од Универзитетот во Единбург.
„Ако се развива лек кој влијае на процесите во телото, чиј ефект досега не е проучен, треба да се внимава на безбедноста“, вели Андерсон.
Скептичен е и неговиот колега Ричард Шарп. Мрежата на рецептори под влијание на витаминот А во телото игра голема улога.
„Мислам дека е невозможно агенсот што влијае на тие рецептори да нема несакани ефекти“, рече професорот на Универзитетот во Единбург.
Професорот Џорџ, кој учествувал во студијата, исто така верува дека безбедноста регистрирана кај животните не е доказ за безбедност кај луѓето. Таа посочи дека се вршат дополнителни испитувања и на други активни состојки.
Целта е да се најде метод за развој на ефикасни и безбедни контрацептивни таблети за мажи.
