Колумбиската влада соопшти дека бунтовничката група Националноослободителна армија, позната како ЕЛН, е одговорна за киднапирањето на таткото на фудбалерот на Ливерпул, Луис Дијаз.
Колумбиската владина делегација, која моментално е во преговори со ЕЛН, соопшти дека има „официјални информации“ дека киднапирањето го извршила „единица на ЕЛН“.
„Бараме ЕЛН веднаш да го ослободи Луис Мануел Дијаз и отсега тие се целосно одговорни за неговиот живот“, рече Оти Патињо, кој ја предводи владината делегација.
Родителите на Луис Дијаз беа киднапирани минатата сабота од вооружени мажи на мотоцикли на бензинска пумпа во малиот град Баранкас на северот на Колумбија.
Мајката на Диас, Силенис Маруланда, беше спасена неколку часа подоцна од полицијата која постави блокади околу градот, кој се наоѓа во близина на границата на Колумбија со Венецуела.
Колумбиската полиција потоа распореди голема сила во потрагата по таткото на играчот на Ливерпул и понуди парична награда од 48.000 долари за информации кои ќе доведат до таткото на Дијаз.
ЕЛН е главната преостаната активна герилска група во Колумбија која се бори против државата од 1964 година и има околу 2.500 членови, пишува денеска Би-би-си. Тие се најактивни во пограничниот регион со Венецуела, каде што живеат родителите на Луис Дијаз.
Во 2022 година, Луис Дијаз пристигна во Ливерпул од Порто. 26-годишниот фудбалер го пропушти натпреварот на Ливерпул против Нотингем Форест во неделата, а неговите соиграчи и менаџерот Јирген Клоп му ја посветија победата.
