Рускиот претседател Владимир Путин има нов генерал кој ја надгледува војната во Украина.
Армискиот генерал Александар Дворников, командант на Јужниот воен округ на Русија, е назначен за командант на руската воена кампања во Украина, соопштија американски и европски претставници.
Дворников (60) беше првиот командант на руските воени операции во Сирија, откако Путин испрати војници таму во септември 2015 година за да ја поддржат владата на сирискиот претседател Башар ал Асад.
За време на неговата команда во Сирија од септември 2015 година до јуни 2016 година, руските сили го поддржаа режимот на Асад и неговите сојузници додека го опколија источниот дел на Алепо контролиран од бунтовниците, бомбардирајќи густо населени населби и предизвикувајќи тешки цивилни жртви. Градот падна во рацете на сириските владини сили во декември 2016 година.
Од 2000 до 2003 година, Дворников учествуваше во долгата руска кампања за смирување во Северен Кавказ, вклучувајќи ја и Втората чеченска војна, која го остави главниот град на Чеченија, Грозни, во урнатини.
Руските сили презедоа сличен пристап во некои делови на Украина, напаѓајќи станбени згради во поголемите градови и уривајќи голем дел од украинскиот пристанишен град Мариупол.
Во март 2016 година, Кремљ на Дворник му ја додели титулата „Херој на Руската Федерација“ за неговите услуги, пишува Си-Ен-Ен. Назначувањето на Дворников за нов командант кој ќе ја води војната во Украина се обидува да го реши проблемот што ги попречи руските сили – недостатокот на координација.
