Според двете страни, во текот на ноќта се воделе жестоки борби меѓу израелските војници и членовите на Хамас во северниот дел на Појасот Газа.
Бригадите Ал-Касам, военото крило на Хамас, известија за судири во северозападниот дел на крајбрежниот појас. Борците на Хамас ги нападнаа израелските војници во областа и југоисточно од градот Газа со противтенковски гранати.
Израелската армија соопшти дека во текот на ноќта војниците наишле на терористички ќелии кои нападнале со противтенковски ракети и рачни гранати. Следеа долги битки, при што израелските сили нападнаа со артилерија и воздушни сили.
Убиени се „десетици терористи“, а уништена е и инфраструктурата на Хамас, соопшти израелската војска. Армијата не даде информации за евентуални жртви меѓу сопствените редови во последните борби.
Најмалку 16 израелски војници се убиени од почетокот на копнените операции во Појасот Газа.
Израел ја напаѓа Газа повеќе од три недели како одговор на најтешкиот масакр во неговата историја, кој на 7 октомври го извршија терористи од Хамас и други екстремистички групи.
Израелската телевизија во средата вечерта јави дека според последните информации, во ненадејниот напад учествувале околу 3.000 милитанти.
