Повеќе од 200.000 малолетници можеби биле жртви на сексуална злоупотреба од страна на свештенството во Шпанија, според проценката објавена денеска од независната истражна комисија на Католичката црква за детски злосторства. Извештајот не ја наведува точната бројка, но содржи анкета спроведена меѓу повеќе од 8.000 луѓе на барање на комисијата, која покажува дека 0,6 отсто од возрасните Шпанци (кои бројат речиси 39 милиони) изјавиле дека биле сексуално злоупотребувани од свештеници кога биле малолетни.
Дополнително, нешто помал број Шпанци (0,53 отсто) изјавиле дека како деца биле сексуално злоставувани од лаици кои работеле во верски институции. Овие оценки се содржани во извештајот што омбудсманот Ангел Габилондо денеска му го предаде на шпанскиот конгрес на пратеници по завршувањето на работата на независната комисија, прва од ваков вид формирана во земјата, за утврдување на степенот на педокриминалот во црквата. .
„Црквата не реагираше соодветно“
Извештајот го критикува однесувањето на Католичката црква, чија реакција на случаите на педокриминал, како што се вели, била „недоволна“. Меѓу мерките понудени во извештајот е и формирањето на државен фонд за исплата на отштета на жртвите. Габилондо на прес-конференцијата рече дека случаите на злоупотреба главно се однесуваат на периодот „од 1970 година до денес“.
Шпанија, земја со силна католичка традиција, сè уште нема спроведено независна истрага за злото, за разлика од Франција, Германија, Ирска и САД. Во својата работа, истражната комисија се потпираше на правни и психолошки експерти и на сведочењата на самите жртви.
