Од април има реален раст на платите. Ефектите од кризите не ги чувствуваат само нашите граѓани, туку се чувствуваат и во Европа и светот. Предизвиците и понатаму остануваат бидејќи има геополитички движења кои влијаат и врз пазарите, изјави денеска министерот за финансии Фатмир Бесими.
Според Бесими платите не растат само номинално, туку реално затоа што инфлацијата се намалува.
– Во ниту еден момент не кажавме дека ќе направиме 100% апсорпција на економскиот шок. Македонија беше најпогодена во однос на цените на европскиот пазар и кај нас и ние тој ефект го ублаживме и ќе продолжиме и понатаму. И граѓаните гледаат дека и покрај тоа што се зголемуваат цените, имаше раст на платите и во јавниот и во приватниот сектор гледано во споредба со другите држави – рече Бесими.
Тој потсети дека македонската економија е мала и високо интегрирана на европскиот пазар и дека 160% од БДП е трговијата од која 80% е со ЕУ, а над половина е со Германија која годинава е во рецесија.
