Страшен масакр се случил утрово во училиште во бразилскиот град Сао Паоло. Шеснаесетгодишен ученик влегол во училиштето Сапопемба во Сао Паоло и почнал да пука при што убил една ученичка со истрел во главата и рани уште три лица.
Полицијата го уапсила напаѓачот.
Нападот почнал во 7 часот и 30 минути по локално време, соопшти полицијата, а како што се наведува ученикот кој пукал бил жртва на малтретирање.
– Бидејќи повеќе не можел да го поднесе малтретирањето во училиште, поточно хомофобијата, решил да го земе пиштолот на татко му. Мајката веќе поднела жалба поради малтретирањето што го претрпел нејзиниот син, а притисокот дополнително се зголемил кога тој решил да носи женска облека – изјавил адвокатот на момчето, пренесува „Ел Паис“.
Властите на Сао Паоло соопштија дека во престрелката биле погодени тројца ученици.
– Еден ученик загина, а тројца се во болница, меѓу кои и еден кој беше повреден додека се обидуваше да избега. Сите жртви се женски, се вели во соопштението.
Според една неодамнешна студија на бразилскиот форум за јавна безбедност, оваа година имало осум слични настани во Бразил.
Напаѓачот употребил огнено оружје и покрај тоа што набавката на оружје во Бразил е многу покомплицирана отколку во САД.
Минатиот април четири деца помлади од седум години беа убиени во градинка во Бразил. Тој настан следеше неполн месец по убиство на ученик во училиште.
Полицијата уапси повеќе од 200 тинејџери поради ширење закани.
