Израелската армија им порача на цивилите кои живеат во северниот дел на Појасот Газа денеска да користат два патни правци за да се упатат кон југ, изјави портпаролот на ИДФ, Авичај Адрае.
Во изјавата објавена на арапски јазик на социјалната мрежа Х, портпаролот Адрае наведува дека двете рути може да се користат без никаква опасност меѓу 10 и 16 часот по локално време.
На оние кои живеат во градот Газа им беше препорачано да се преселат јужно од Беит Ханун до Кан Јунис, пред можната копнена офанзива од страна на израелската армија.
„На луѓето кои живеат во близина на плажата и западно од Олива ќе им биде дозволено да се движат по улиците Далдул и Ал-Сана кон Салах Ал-Дин и Ал-Бахр“, додаде Адрае.
Највисокиот европски дипломат, Жозеп Борел, пак, утринава на прес-конференција изјави дека е целосно невозможна евакуацијата на 1 милион лица од северниот дел на Газа.
Десетици илјади цивили вчера почнаа да бегаат од јужниот дел на Газа откако Израел им порача на луѓето да ја напуштат областа пред очекуваната копнена офанзива.
-Да се замисли дека можеш да преселиш милион луѓе за 24 часа во ситуација како во Газа, може да биде само хуманитарна криза – рече Борел на последниот ден од тридневната дипломатска посета на Кина.
И покрај изјавата на ЕУ за поддршка на Израел, тој исто така предупреди дека е должен да го почитува меѓународното хуманитарно право во одбранбениот процес.
„Позицијата е јасна“, рече Борел. „Но, како и секое право, тоа има граница. А таа граница е меѓународното право“.
