Откако Меѓународниот кривичен суд во Хаг (МКС) издаде налог за апсење на Владимир Путин во март, тој за прв пат замина во посета на странство.
Рускиот претседател Владимир Путин денеска пристигна во посета на Киргистан, што е негово прво патување во странство откако Меѓународниот кривичен суд во Хаг (МКС) издаде налог за негово апсење во март. Се очекува Путин да остане во централноазиската поранешна советска република до петок и, меѓу другото, да присуствува и на самитот на Комонвелтот на независни држави (ЗНД).
Пристигнувањето на Путин во Киргистан го објавија руските медиуми, вклучително и новинските агенции Тас, Интерфакс и РИА Новости.
На самитот на ЗНД се очекува да присуствуваат и блискиот сојузник на Путин, белорускиот претседател Александар Лукашенко и други шефови на држави во регионот. Рускиот претседател ќе се сретне и со својот киргистански колега Садир Жапаров и ќе оствари уште неколку билатерални средби, јавува германската новинска агенција dpa.
Земјите го ратификуваа договорот за заеднички систем за противвоздушна одбрана
Киргистанските власти пред посетата на Путин објавија дека земјата го ратификувала договорот со Русија за заеднички систем за противвоздушна одбрана. Слични договори Русија склучила и со Белорусија, Казахстан и Таџикистан, пренесува француската новинска агенција АФП.
Ова е прво патување на Путин во странство откако МКС издаде налог за негово апсење во март за наводни воени злосторства за време на руската инвазија на Украина. МКС се сомнева дека Путин е одговорен за илегалната депортација на илјадници украински деца од окупираните територии. Судот издаде и потерница по руската комесарка за правата на децата Марија Лвова-Белова.
Москва ги негира наводите и инсистира на тоа дека налогот е правно неважечки бидејќи Русија не ја признава јурисдикцијата на МКС. Во исто време, тие исто така постојано нагласуваат дека евентуалното апсење на Путин во странство ќе биде сфатено како чин на војна.
Во пракса, руските власти презедоа одредени превентивни мерки. Меѓу другото, Путин не присуствуваше на самитот на групата пет најголеми економии во развој (Брикс) во Јужна Африка, која е членка на МКС, во август. Киргистан, од друга страна, не е член на судот.
