Германија планира да испрати своја бригада од 4.000 војници во Литванија, која ќе биде распоредена на границата кон Русија, информираше германскиот министер за одбрана Борис Писториус во интервју за естонската државна телевизија ЕРР.
– Се очекува формирањето на бригадата да го видиме на крајот на 2024 година. Ова е сериозен предизвик не само за Литванија, туку и за нас. Ова е без преседан за германскиот Бундесвер. Никогаш досега не сме распоредиле цела бригада во странство – изјави Писториус, додавајќи дека тоа ќе биде логистички предизвик.
Тој додаде дека германската влада го разгледува и прашањето за почеток на производство на муниција во Естонија.
– Ќе треба да утврдиме во која естонска област би можеле да ја прошириме соработката и индустриското производство, но тоа не е прашање на владата, туку на германската одбранбена индустрија, која е приватна, а не државна сопственост – рече министерот.
Во меѓувреме, началникот на германската армија генерал Карстен Бројер предупреди дека војната во Украина може да ескалира и повика на зголемување на одбранбените способности на Германија и НАТО, јави ДПА.
Бројер, кој е главен инспектор на Бундесверот, спомена дека некои знаци во поставувањето пред анексијата на Крим во 2014 година и минатогодишната инвазија на Украина од страна на Русија, тогаш не биле земени предвид, а требало.
– Германија не беше во состојба да излезе од својата комфорна зона и не сакаше да верува дека тоа може да се случи – истакна тој во говорот во пресрет на денешниот национален празник на Германија.
Според него, „резултатот е дека Берлин сега мора да ги поддржи земјите кои може да се сметаа како линија на фронтот“, и тоа го прави, на пример, како што посочи, со распоредување бригада во Литванија.
– Руската нелегална инвазија на Украина ја изнесе во преден план важноста да се има борбено подготвени сили – изјави Бројер на приемот што го организираше постојаниот претставник на Германија во НАТО, Геза Андреас фон Гер.
Тој истакна дека порано било потребно „стратешко трпение и стратешка смиреност“, а дека денес е неопходна „брза реакција“.
Фон Гер исто така даде лоша прогноза за безбедносната ситуација во Европа.
