Свештениците во Полска организирале забава со вијагра и машка проститутка, а кога работите излегле од контрола морале да повикаат брза помош, но дошла и полиција. Се започнало кога машка проститутка изгубила свест. Црквата призна дека инцидентот се случил, а обвинителството најави истрага.
Минатата недела Газета Виборча, водечки либерален дневен весник во Полска, објави дека свештениците во Даброва Горница, град во јужна Полска, организирале забава во зграда на бискупијата на која била поканета машка проститутка, пренесува Дневник.хр.
„Настанот беше од чисто сексуален карактер. Нејзините учесници земаа лекови за подобрување на потенцијата“, изјави неименуван извор.
Но, забавата излегла од контрола, а машката проститутка изгубила свест, поради што била повикана брза помош. Меѓутоа, кога пристигнала екипата на итната помош, им било одбиено влезот во просториите. Според извештаите, брзата помош потоа повикала полиција, која им помогнала да стигнат до повредениот.
Портпаролот на локалното обвинителство изјави дека е отворена истрага за евентуално неукажување помош на лице чие здравје е загрозено, што е кривично дело за кое е предвидена казна затвор до три години.
Настаните потоа добија дополнителен драматичен тек. Во четвртокот вечерта некој ја запалил вратата од базиликата во близина на местото каде што наводно се случил инцидентот. Пожарникарите го изгаснале пожарот, а повредени нема. Полицијата подоцна приведе маж осомничен дека го подметнал пожарот.
Во петокот црквата објави дека свештеникот во чиј стан се случи инцидентот е ослободен од сите црковни должности „до расчистување на работата“.
По скандалот, бискупот објави писмо во кое се извинува за неодамнешните „болни настани“ и ги срами инволвираните свештеници, но не даде никакви детали за тоа што се случило.
„Им се извинувам на сите што беа погодени и тагуваа, па дури и скандализирани од ситуацијата“, напиша бискупот и додаде: „Секој што ќе биде прогласен за виновен ќе биде казнет според канонското право, без оглед на пресудата на граѓанскиот суд“.
