Азербејџанските власти соопштија дека продолжуваат со Русија за разоружување на силите во Нагорно-Карабах, регион претежно населен со Ерменци, каде што азербејџанската армија започна кратка офанзива претходно оваа недела.
„Во тесна соработка со руските мировни сили вршиме демилитаризација“ на сепаратистичките сили, изјави неименуваниот портпарол на азербејџанската армија во Нагорно Карабах, која три години е под контрола на Азербејџан.
„Веќе запленивме оружје и муниција“, додаде портпаролот без да даде повеќе детали.
Според него, процесот на разоружување може да потрае, бидејќи некои сепаратистички борци биле стационирани во оддалечените планински области.
Во вторникот Азербејџан започна воена операција во Нагорно-Карабах, која заврши по 24 часа со договор со Ерменците да го положат оружјето и да преговараат за реинтеграција на отцепената територија во Азербејџан.
Азербејџанскиот претседател Илхам Алиев во средата по потпишувањето на примирјето изјави дека Азербејџан „го обновил својот суверенитет во Нагорно-Карабах“.
Во 2020 година, Ерменија и Азербејџан се судрија околу контролата врз регионот Нагорно-Карабах, а конфликтот заврши со мировен договор со кој се призна победата на азербејџанските сили. Договорот е постигнат со помош на Русија.
Оттогаш руски војници се стационирани во Нагорно Карабах, но Ерменија долго време се жали на нивната неефикасност. Изолацијата на Русија на меѓународната сцена, поради конфликтот во Украина, го ограничува и просторот за маневрирање на Москва.
Нагорно-Карабах, територија населена претежно со Ерменци, се отцепи од Азербејџан, што доведе до војна која однесе 30.000 животи во 1990-тите.
