Доказите силно сугерират дека украинска била ракетата која залутала на пазарчето во градот Костјантиновка во Украина и убила најмалку 15 цивили, додека повеќе од 30 се ранети, тврди Њујорк Тајмс. Познатиот весник во сопствена анализа ги споредува наодите од сателитските снимки, фрагментите од проектилот, сведоштвата на граѓаните и објавите на социјалните мрежи.
Експертите за противвоздушна одбрана велат дека ракетите како таа што го погодила пазарот може да тргнат надвор од курсот поради различни причини, вклучително и електронска неисправност или „перка“ за наведување која е оштетена или отсечена во моментот на лансирање.
Со други зборови, се чини дека ударот бил трагична несреќа. Украинскиот претседател, пак, Володимир Зеленски, помалку од два часа по нападот ги обвини руските „терористи“.
Њујорк Тајмс ја класифицира ракетата како проектил од системот Бук. Тој ги пробил стаклата на пазарчето, а некои жртви биле повредени „до непрепознатливост“.
Претходната вечер Русите го гранатирале градот, па ракетата залутала во одбрана. Локалниот канал на Костјантиновка на Телеграм објави украински артилериски оган од градот само неколку минути пред да биде погоден пазарот.
Портпаролот на вооружените сили на Украина изјави дека безбедносната служба на земјата го истражува инцидентот и дека не може дополнително да коментира според националниот закон.
Тајмс тврди дека украинските власти првично се обиделе да ги спречат нивните новинари да пристапат до ракетните остатоци и до областа на ударот веднаш по ударот. Но, новинарите на крајот успеале да стигнат до местото на настанот, да ги испрашаат сведоците и да ги подигнат остатоците од употребеното оружје.
Снимките од безбедносните камери покажуваат дека проектилот паднал во Костјантиновка од правец на територијата под контрола на Украина, а не зад руските линии.
Како што се слуша звукот на проектил што се приближува, најмалку четворица пешаци се чини дека истовремено ги вртат главите кон звукот што се приближува. Тие се свртени кон камерата – во правец на териториите контролирани од Украина. Неколку моменти пред да погоди, одразот на проектилот е видлив на покривите на два паркирани автомобили, што укажува дека тој доаѓал од северозапад.
– Боевата глава на проектилот експлодирала неколку метри над земјата непосредно пред ударот, расфрлајќи метални фрагменти. Резултирачкиот кратер и штетата што се протега од точката на детонација се во согласност со проектилот што доаѓа од северозападна рута – изјави за Тајмс експерт за експлозиви.
Доказите собрани од Њујорк Тајмс покажуваат дека неколку минути пред нападот, украинската војска лансирала две ракети земја-воздух кон руската фронтална линија од градот Дружкивка, 16 километри северозападно од Костјантиновка.
Репортерот на Тајмс, исто така, прегледал и други ракетни фрагменти пронајдени на повеќе локации во Украина кои биле истрелани од руските системи за противвоздушна одбрана С-300, С-400 и Бук, како и два различни американски системи за противвоздушна одбрана. Нивните форми и мерења покажуваат дека штетата на пазарот најверојатно е предизвикана од 9M38.
Двајца независни воени експерти за отстранување бомби, кои побараа да останат анонимни за да зборуваат искрено, дојдоа до истиот заклучок и рекоа дека фрагментите и оштетувањата на местото на удар најмногу се совпаѓаат со 9M38.
Се работи за дупки од 8 и од 13 милиметри.
