Во Картум, главниот град на Судан, неколку згради се запалија по тешките судири меѓу армијата и паравоените сили на РСФ, вклучувајќи го и познатиот облакодер на нафтената компанија Голем Нил. Болниците во Картум и регионот Дарфур престанаа да работат, а жителите на главниот град ги опишаа борбите минатиот викенд како најлоши досега.
Снимките кои кружат на социјалните мрежи во неделата го покажуваат иконскиот судански облакодер GNPOC (Greater Nile Petroleum Oil Company) во пламен.
Изградбата на 18-катната зграда е завршена во 2010 година, а се наоѓа во Картум покрај реката Нил.
„Ова е навистина болно“, напиша Тагред Абдин, архитект на зградата во објава на социјалната мрежа „Икс“, порано позната како Твитер. Абдин додаде дека зградата ја означува панорамата на градот и жали за нејзиното „бесмислено уништување“.
Сè уште не е јасно што го предизвикало пожарот во зградата налик на конус, која има стаклена фасада, јавува Би-Би-Си. Нема извештаи за повредени или загинати.
Насилството во Судан започна на 15 април поради борбата за моќ меѓу водачите на суданската армија и паравоените сили за брза поддршка (РСФ).
Судан Воен монитор, кој го следи конфликтот, соопшти дека силите на РСФ во саботата нападнале области под контрола на армијата, вклучувајќи ја и канцеларијата на Министерството за правда. Се вели дека неколку владини згради се запалиле како резултат на нападот.
Нападите на областите под контрола на армијата продолжија во неделата, изјавија очевидци за новинската агенција АФП. Навал Мохамед (44), која живее на најмалку три километри од борбите во главниот град, рече дека вратите и прозорците од нејзината куќа се треселе од експлозиите. Таа ги опиша битките минатиот викенд како „најлоши од почетокот на војната“.
Здравствените власти во неделата објавија дека сите големи болници во Картум и регионот Дарфур престанале со работа.
РСФ се бори да ја преземе контролата над главниот град, додека воените воздушни напади имаат за цел да ги ослабат паравоените позиции.
Во конфликтот досега загинаа околу 7.500 луѓе, а повеќе од пет милиони се раселени.
